ചെറുകിട വ്യവസായങ്ങൾക്ക് കരുത്തേകാൻ ₹10,000 കോടിയുടെ 'എസ്എംഇ ഗ്രോത്ത് ഫണ്ട്'; കേന്ദ്ര മന്ത്രിസഭയുടെ അംഗീകാരം

ഇന്ത്യയിലെ ചെറുകിട, ഇടത്തരം വ്യവസായ മേഖലയ്ക്ക് വലിയ ഉത്തേജനം നൽകിക്കൊണ്ട് 10,000 കോടി രൂപയുടെ 'എസ്എംഇ ഗ്രോത്ത് ഫണ്ട്' രൂപീകരിക്കുന്നതിന് പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭ അംഗീകാരം നൽകി. 2026-27 കേന്ദ്ര ബജറ്റിൽ പ്രഖ്യാപിച്ച ഈ പദ്ധതി, രാജ്യത്തെ ചെറുകിട സംരംഭങ്ങളെ ആഗോളതലത്തിൽ മുൻനിരയിലേക്ക് ഉയർത്തുക എന്ന ലക്ഷ്യത്തോടെയുള്ള സർക്കാരിന്റെ “ക്രിയേറ്റിംഗ് ചാമ്പ്യൻ എംഎസ്എംഇ” തന്ത്രത്തിന്റെ ഭാഗമാണ്.

ഈ പുതിയ ഫണ്ട് വഴി ചെറുകിട വ്യവസായങ്ങൾക്ക് തങ്ങളുടെ ഉത്പാദന ശേഷി വർദ്ധിപ്പിക്കാനും, വിപുലമായ പ്രവർത്തനങ്ങൾ നടത്താനും, ആധുനിക സാങ്കേതികവിദ്യകൾ സ്വായത്തമാക്കാനും ആവശ്യമായ ദീർഘകാല മൂലധനം ലഭ്യമാകും. ഉയർന്ന വളർച്ചാ സാധ്യതയുള്ളതും ബിസിനസ്സ് വിജയസാധ്യത തെളിയിച്ചിട്ടുള്ളതുമായ സംരംഭങ്ങൾക്കാണ് ഈ ഫണ്ടിന്റെ പ്രയോജനം ലഭിക്കുക. ഫണ്ടിന്റെ ഭൂരിഭാഗവും ഉൽപ്പാദന മേഖല കേന്ദ്രീകരിച്ചുള്ള സംരംഭങ്ങൾക്കാണ് അനുവദിക്കുകയെങ്കിലും, സേവനം, സാങ്കേതികവിദ്യ, നൂതനാശയങ്ങൾ തുടങ്ങിയ മറ്റ് മേഖലകളിലെ സംരംഭങ്ങൾക്കും ഇതിന്റെ പിന്തുണ ലഭിക്കും.

ഇതോടൊപ്പം, 2021-ൽ ആരംഭിച്ച 'സെൽഫ് റിലയന്റ് ഇന്ത്യ ഫണ്ടിന്റെ' പ്രവർത്തനങ്ങൾ തുടരുന്നതിനായി ധനമന്ത്രി നിർമ്മല സീതാരാമൻ 2,000 കോടി രൂപ കൂടി അധികമായി അനുവദിക്കാൻ നിർദ്ദേശിച്ചിട്ടുണ്ട്. കൂടാതെ, ചെറുകിട സംരംഭങ്ങൾക്ക് വേഗത്തിലും കുറഞ്ഞ നിരക്കിലും സാമ്പത്തിക സഹായം ഉറപ്പാക്കുന്നതിനായി 'ട്രേഡ് റിസീവബിൾസ് ഇ-ഡിസ്കൗണ്ടിംഗ് സിസ്റ്റം' പ്ലാറ്റ്‌ഫോമിനെ ഗവൺമെന്റ് ഇ-മാർക്കറ്റ്‌പ്ലെയ്‌സുമായി ബന്ധിപ്പിക്കും. കേന്ദ്ര പൊതുമേഖലാ സ്ഥാപനങ്ങൾ എംഎസ്എംഇകളിൽ നിന്ന് നടത്തുന്ന എല്ലാ പർച്ചേസുകളുടെയും ഇടപാടുകൾ ടിആർഇഡിഎസ് പ്ലാറ്റ്‌ഫോം വഴി നിർബന്ധമാക്കാനും നിർദ്ദേശമുണ്ട്.

ഇന്ത്യയുടെ സമ്പദ്‌വ്യവസ്ഥയിൽ നിർണ്ണായക പങ്കുവഹിക്കുന്ന എംഎസ്എംഇ മേഖല, രാജ്യത്തെ മൊത്തം ഉൽപ്പാദനത്തിന്റെ 35.4 ശതമാനവും, കയറ്റുമതിയുടെ 48.58 ശതമാനവും, ജിഡിപിയുടെ 31.1 ശതമാനവും കൈയാളുന്നുണ്ട്. രാജ്യത്തെ 7.47 കോടിയിലധികം വരുന്ന ഇത്തരം സംരംഭങ്ങളിലായി 32.82 കോടിയിലധികം ആളുകൾ ജോലി ചെയ്യുന്നു. ഈ വലിയ വിപണിയെ കൂടുതൽ ശക്തിപ്പെടുത്തുന്നതിനായി കേന്ദ്ര സർക്കാർ എംഎസ്എംഇ മന്ത്രാലയത്തിന് 24,566.27 കോടി രൂപയാണ് ഇത്തവണത്തെ ബജറ്റിൽ മാറ്റിവെച്ചിരിക്കുന്നത്.

Content Highlights:The Union Cabinet has approved the ₹10,000 crore SME Growth Fund to strengthen India’s small and medium-sized businesses.The fund was announced in the Union Budget 2026-27 as part of the government’s “Creating Champion MSMEs” strategy.